Nan lai lahie tahun 70 an kabawah mungkin lai bapangalaman jo profesi nan ciek ko? apo lai nan acok kapasa. Kalau ambo yo ado loh hobi snek mancilok cilok mandanga ota ditangah pasa ko, apo lai kalau lah di janjian mangaluaan binatang nan ado di dalam peti…arok arok cameh manunggunyo.
Pagi pagi baru pasa tabukak nan tukang ubek
Ko lah mahampakan karpet atau lapiak ditangah pasa, sambie manyetel toa tukang ubek mulai maota ….nan jauah tolong mandakek nan ranggang tolong marapek katonyo. Ciek jo duo urang mulai bakumpua, makin lamo makin rami sampai akhienyo tukang ubek lah dikulilingi dek urang rami. Mulai lah tukang ubek ko bacarito tantang babagai pangalamannyo bakuliliang Indonesia sampai kalua nagari bagai. Nyo caliakan pulo poto poto nyo jo bapak pejabat bagai. Pangalaman jadi pareman…pokoknyo sagalo pengalaman nan mambuek urang nan bakuliliang takagum kagum.
Tarakhir biasonyo….iko nan apa bana dek ambo keceknyo……
” Dek lah lamo bakuliliang di nagari urang, lah wakatunyo pulo ambo babaliak ka kakampuang, mambantu dunsanak dunsanak nan ado dikampuang.Kalau ndak awak nan mambantu dunsanak sia pulo lai. Nan kiniko ambo babaliak kakampuang mambao oleh oleh untuak sanak sado alahe….ubek sagalo ubek.Rematik jumbalang sakik pinggang, kada jo kurok landeh dek ubek ko. Kalau di nagari urang ubek ko ambo jua 50 puluah ribu saboto, tapi kini ko dek iko oleh oleh untuak sanak sadoalahe….ambo gratiskan…….cuma ado ongkoih transpornyo se sakenek. Pangganti transport nyo…cukuik 20 ribu se saboto.” Hahaha…..
Biasonyo untuak babarapo lamo alun ado nan mambali….tapi biasonyo tibo tibo se lah ado nan manunjuak……
” Mak….awak bali tigo boto”
“Yop tigo boto…..lanjut”
Tibo tibo ado pulo nan manujuak dari sabalah kida….
“mak..dek awak duo boto “…..
“yop duo boto”.
Mancaliak nan mode tu urang rami nan lain lah bagaduruh pulo barabuik mambali ubek nantun…….
Kalau nan terakhir ko (mambali) yo ambo ndak sato lai do. Karano ambo tahu sarato kenal jo tukang ubek ko….dan kenal juo jo nan mambali nan partamo tadi…inyo kamanakan tukang ubek, tukang panciang namonyo…….hahahaaaa.
Biasonyo…..nan ambo tunggu tunggu….mambukak peti ajaib nan dibaonyo, sampai abih pulo galehnyo yo ndak dibukak bukak do……๐๐๐๐๐๐
Ikolah gadele tukang ubek…..
Maaf khusus buat yang ngerti bahasa minang๐๐๐?
DR. ED 